Badago dantzatzeko beste modu bat, naturalagoa, lasaiagoa eta dibertigarriagoa. Doinu bat entzutean berez oinak mugitzen ditugunean, kulunka egiten dugunean, edo hatzamarren puntekin erritmoa markatzen dugunean, musika sentitzen ari gara eta dantzari ateak irekita. DANTZALDI IBILTARIA dantza zaletasuna da eta dantzarako musika jo eta sortzeko gozamena. Musika jo, dantzatu, partekatu eta irakatsi.

Dantzaldi ibiltaria

Dantzaldi ibiltaria martxan jarri zenean, hilero Durangoko Plateruena Kafe Antzokian egiten genuen erromeriekin hasi ginen, eta, herriz herri, modu ibiltarian, Bizkaian zehar egiten genituen egun bateko tailerrekin, guztiak dantzan gozatu dezakegula erakusten, aspaldiko erromerien xarma konpartitu nahiean. Lehen eguneko tailerretik, agerian gelditu zen ikastaldi luzeagoen behar izana eta nahia, eta horrela 2008. urtean ikastaro egonkorrak antolatu genituen urritik ekainera hainbat herritan eta 2016-2017 ikastaldian, 500 ikasle baino gehiago izan ditugu. Gure erromeriak dantzazaleen bilgune bihurtu dira, eta hori gutxi balitz, aparteko ekitaldiak ere antolatzen ditugu: abenduan eta ekainean dantzazale egunak; Bilboko Aste Nagusiko Dantzapoteoa; Iñauteri inguruan egiten dugun Torrijaldia; BANDtzaldia  herriko bandekin dantzan egiteko ekimena; UPV/EHUrekin antolatutako "Tradegin: tradiziozko dantza garaikidea egin", Dantzakantu ikastaroak...

Denbora honetan jasotako esperientziak, 2017-18 ikastaldirako ere, ekimen eta  egitarau desberdinak proposatzeko gogoa eta ilusioa sortzen digute.

Dantzarako leku bat

Ikastaroen eskeintza egonkorra berregitu egin dugu, eta horrela, batetik, gurekin dantzan ikasten hasi nahi duenarentzat oinarrizko dantza ikastaroak antolatu eta eskeintzen ditugu, eta bestalde, "dantzagunea" deitzen dugun hori. Dantzaguneak, oinarrizko dantza ezagupena dutenentzako pentsatuak daude, astero elkartu eta elkarrekin dantzaz gozatzeko aukera emateko, dantzan praktikatzeko leku, toki edo gunea. AIKOko dantza maisuek gidaturik dantzan ekiteko aukera bat, edo/eta dantzakera hobetzekoa, edo/eta pausu eta dantza berriak ikastekoa.

Azken batean, dantzaldi ibiltariak hasteko, oinarrizko dantza ikastaroak eskeintzen ditu, eta bestalde, oinarrizko maila bat dutenentzako (ikastaroak eginikoak, dantzari eta dantzari ohiak, dantzazaleak…) astero elkartu eta praktikatzeko, dantzaguneak.

Kantu-txokoa

Kantuz sortu naiz eta kantuz nahi bizi, kantuz igortzen ditut nik penak ihesi...

Aurten Kantu-txokoaren hirugarren urtea dugu Dantzaldi Ibiltarian, eta bertan, Bidasoaren bi aldeetako doinu zaharrak zein berriak ikasi eta kantatuko ditugu. Nahi baduzu kantuz gozatu eta bihotzaren taupaden erritmoa sentitu, zatoz zeu ere!

Aiko taldean, aspaldi konturatu ginen gure eskoletan dantzan ikasteko, musika barneratzeko, kantatzea ezin bestekoa dela. Eta horrela, 2015-16 ikasturtean, dantza-kantu ikastaroa martxan jarri genuen Bilbon, eta momentuz hor jarraitzen dugu tradiziozko kantuzaleentzat gune bat sortu nahiean, gure Kantu-txokoa. Talde bitan lan egiteko asmoa dugu, lehena, 18:30-19:30 ordutegian, ikasleak nahi izan ezkero, jarraian Dantzagunera dantzan joateko (19:30-21:00); eta bigarren talde bat 19:30-20:30, Oinarrizko dantza ikastaroa egin ondoren (18:00-19:30) kantuan aritzeko asmoa dutenentzat. Dena astelehenetan Teatro Campos Antzokian.

Dantzaldi Ibiltariaren egitura

Dantzaldi Ibiltaria ekimenak formazioa eta ludikotasuna elkartzen ditu eta hainbat jarduera biltzen ditu:

  • tailer ibiltariak: herri batean eta bestean egiten diren hastapeneko tailer edo ikastaroak, ordu bikoak. Dantza tradizionala ikasteko “demoak” edo “clinicak” direla esan daiteke.
  • ikastaro egonkorrak eta dantzaguneak: 2017-18 ikasturtean, Bilbo, Donosti, Galdakao, Markina-Xemein, Gernika-Lumo eta Durangon izango gara asteroko eskolak emanez.
  • dantzaldi-erromeriak, bertan, tailer eta ikastaroetan ikasitakoa praktikatzeko aukera dugu, gehiago ikasteko, dantzan gozatzeko, beste zaletu batzuk ezagutzeko, etab. 
  • dantza-asteburuak: hiru hilero asteburu batez biltzen gara gai jakin baten inguruan elkartu, elkar ezagutu, ikasi eta ondo pasatzeko asmoz.
  • ikastaro/mintegi monografikoak: beharrizanen arabera, edo eskakizunen arabera, ikastaro edo mintegi monografikoak ere ematen ditugu.
AIKO TALDEA en Twitter AIKO TALDEA en Facebook AIKO TALDEA en YouTube

© Aiko Taldea • 634 423 539 • aiko@aikotaldea.eus